ММО-63, I даваа: сурагчдын хариултыг системд оруулах заавар (10-29, 17:30 хүртэл)
ММО-63-ын I давааны сурагчдын хариултыг 2026 оны 10-р сарын 29-ний 17:30-аас өмнө сургуулийн бүртгэгч багш mmo.mn системд оруулна. Хариултыг имэйлээр илгээх шаардлагагүй, хугацаа хоцорсон хариултыг хүлээн авахгүй.
1. Excel загвар хаанаас татах вэ?
Анхаар: «Загвар татах», «Системд хуулах» товч нь «Бүх сурагчид» хуудсанд биш, ангилал тус бүрийн олимпиадын хуудсанд байна. www.mmo.mn/files хэсэгт байгаа «хариултын хуудас» (PDF) нь сурагчдад цаасаар бөглүүлэх хуудас бөгөөд системд оруулах Excel загвар биш.
- Бүртгэгч багшийн аккаунтаар (нэвтрэх нэрээрээ, имэйлээр биш) mmo.mn-д нэвтэрнэ.
- «Миний сургуулиуд» цэснээс сургуулиа сонгож, сургуулийн нүүр хуудасны доод хэсгийн «Сургуулийн I давааны тестүүд» жагсаалтаас ангиллын олимпиадын нэр дээр дарна. Эсвэл шууд дараах хаягаар орно ({сургуулийн_ID}-г өөрийн сургуулийн дугаараар солино; сургуулийн хуудасны хаягнаас харж болно):
- C ангилал (5–6-р анги): www.mmo.mn/schools/{сургуулийн_ID}/olympiad/279/
- D ангилал (7–8-р анги): www.mmo.mn/schools/{сургуулийн_ID}/olympiad/280/
- E ангилал (9–10-р анги): www.mmo.mn/schools/{сургуулийн_ID}/olympiad/281/
- F ангилал (11–12-р анги): www.mmo.mn/schools/{сургуулийн_ID}/olympiad/282/
- Хуудасны «1. Загвар татах» товчийг дарж тухайн ангиллын бүртгэлтэй сурагчдын ID, нэр бүхий Excel файлыг татна.
2. Хариултыг шивэх
- Бодлогын баганад (№1, №2, …) сурагч бүрийн тоон хариуг (натурал тоо) шивнэ. Бодоогүй бодлогын нүдийг хоосон үлдээнэ.
- Оролцоогүй сурагчдын мөрийг хоосон үлдээж болно — хоосон мөрийг систем автоматаар хасна (устгах шаардлагагүй).
- ID багана болон баганын бүтцийг өөрчлөхгүй. ID-г цаасан хариултын хуудастай тулгаж шалгана.
- Нэг сурагч хоёр ID-тай бол хариултыг зөвхөн нэг ID дээр бичиж, нөгөө мөрийг устгана.
3. Системд оруулах
- Мөн хуудасны «2. Дүн хуулах» хэсгээс бөглөсөн файлаа сонгоод «Системд хуулах» товчийг дарна.
- Оруулсны дараа «Хариулт харах» хэсгээс хариулт зөв орсон эсэхийг шалгана. Засах бол файлаа засаад дахин «Системд хуулах» — өмнөх хариу шинэчлэгдэнэ.
- Ангилал бүрийг тусад нь (C, D, E, F) оруулна.
4. Бүртгэлгүй сурагч оролцсон бол
Олимпиадын дараа сургуулийн «Бүх сурагчид» хуудаснаас «Бүртгэлтэй сурагч хайх» (нэр/ID-аар) эсвэл «Шинээр бүртгэл үүсгэх»-ээр бүртгэж, ангиллыг зөв сонгоно. Дараа нь «Загвар татах»-аар шинэ загвар татаж хариултыг шивнэ, ID-г цаасан хариултын хуудсанд нөхөж бичнэ. Сургуульд элсэх хүсэлт илгээсэн сурагчдыг «Бүх сурагчид» хуудасны дээд хэсгээс «Бүртгэх» товчоор батлахгүй бол загварт гарахгүй. Албан ёсны бүртгэлийн хугацаа 10-26-нд дууссан тул хоцорсон бүртгэлээс үүсэх алдааг хороо хариуцахгүй.
Анхаарах
- 10-27–30-ны хооронд сайт зөвхөн бүртгэгч багш, удирдлага, мэргэжилтнүүдэд нээлттэй. Facebook/Messenger доторх хөтчөөр биш, Chrome эсвэл Safari ашиглана уу.
- Сүүлийн цагт систем ачаалалтай байдаг тул хариултаа эрт оруулаарай.
- Системд оруулахад техникийн асуудал гарвал бөглөсөн Excel файлаа хугацаанд нь (10-29-ний 17:30-аас өмнө) registration@mmo.mn хаягт сургуулийн нэр, аймаг/дүүрэг, ангиллын хамт илгээнэ.
- Цаасан хариултын хуудсыг албан ёсны дүн гартал сургууль дээрээ битүүмжлэн хадгална.
- Урьдчилсан дүнг 10-р сарын 30-нд зарлана.
Сүүлийн засвар: 2026-10-29, Нийтэлсэн: 2026-10-28