ММО-63, I даваа: сэдэв хүлээн авах заавар ба удирдамж
ММО-63-ын I даваа өнөөдөр, 2026 оны 10-р сарын 28-нд (Лхагва) болно. Олимпиадын сэдвийг 14:00 цагт хүргүүлж, бодолт 15:00 цагт эхэлнэ. Сургуулийн бүртгэгч багш, удирдлага, ажлын хэсгийнхэн доорх зааврыг олимпиад эхлэхээс өмнө бүрэн уншина уу.
Сэдэв татах: www.mmo.mn/files
(14:00-өөс эхлэн, сургуулийн бүртгэгч багшийн эрхээр нэвтэрсэн үед харагдана)
1. Сэдвийг хэрхэн авах вэ?
Өөрчлөлт: сэдвийн нууцлалыг хангах үүднээс энэ удаа сэдвийг сургуулийн имэйл рүү илгээхгүй. Сэдвийг 14:00 цагт доорх хоёр замаар хүргэнэ. Аль нэгээр нь авахад хангалттай.
- Системээс. Сургуулийн бүртгэгч багш mmo.mn-д нэвтэрч, www.mmo.mn/files хуудаснаас C, D, E, F ангиллын сэдвийг татаж авна. Хариултын хуудас болон удирдамж мөн энэ хуудсанд байгаа. Нууц үгээ мартсан бол энд дарж 14:00-өөс өмнө сэргээнэ үү.
- Аймаг, дүүргийн боловсролын газраар. Сэдвийг аймаг, дүүргийн боловсролын газарт хүргүүлж, тэд сургуулиудад албан шугамаар дамжуулна.
14:00 цагт сэдэв /files хуудсанд харагдахгүй байвал 5–10 минут хүлээгээд хуудсаа шинэчилнэ үү (refresh, F5). Олон сургууль зэрэг хандаж байгаа тул материал байршиж, харагдахад бага зэрэг хугацаа шаардагдаж болно. Үүний дараа ч харагдахгүй байвал өөрийн аймаг, дүүргийн боловсролын газрын олимпиад хариуцсан мэргэжилтэнд хандана уу. Аль ч замаар авч чадаагүй тохиолдолд л registration@mmo.mn хаягаар сургуулийн нэр, аймаг/дүүргээ бичиж хүсэлт ирүүлнэ үү.
Сэдвийг сурагчдын тоогоор хувилж, 15:00 хүртэл битүүмжилж хадгална.
2. Яагаад сургуулийн имэйл рүү сэдэв илгээхгүй болсон бэ?
Олон сургуульд сурагчдын mmo.mn-ийн аккаунтыг сургуулийн удирдлага, багшийн имэйл хаягаар бүртгүүлсэн байна. Ийм хаяг руу сэдэв илгээвэл тухайн имэйлд хандах боломжтой сурагч олимпиадаас өмнө сэдвийг харах эрсдэлтэй. Иймд сэдвийг зөвхөн аймаг, дүүргийн боловсролын газарт хүргэж, тэдгээрээр дамжуулан албан шугамаар тараахаар шийдвэрлэлээ.
- Математикийн олимпиадын хорооны бодлогоор хэрэглэгч бүр өөрийн имэйл хаягаар бүртгүүлнэ. I давааны дараа сурагчдынхаа аккаунтыг өөрсдийнх нь имэйлд шилжүүлэхийг хүсье. Шаардлагатай бол (ID, шинэ имэйл) хүснэгтээ registration@mmo.mn хаягаар ирүүлбэл бид сольж өгнө.
3. Хугацаа
| Ангилал | Анги | Бодлого | Бодох хугацаа |
|---|---|---|---|
| C | 5–6 | 10 | 2 цаг (15:00–17:00) |
| D | 7–8 | 10 | 2 цаг (15:00–17:00) |
| E | 9–10 | 12 | 2 цаг 30 мин (15:00–17:30) |
| F | 11–12 | 12 | 2 цаг 30 мин (15:00–17:30) |
Бодолт 15:00 цагт эхэлнэ. Ямар нэг шалтгаанаар хоцорч эхэлсэн бол эхэлсэн цагаас нь тоолж, сэдэв дээр заасан хугацааг бүрэн олгоно.
4. Олимпиадын үеийн дэг журам
Зохион байгуулагч багш, ажлын хэсэгт:
- Сэдвийг хувилах, хадгалах ажлыг цөөн хүний хүрээнд хийж, 15:00 хүртэл сурагчдад үзүүлэхгүй.
- Нэг ангилалд оролцох сурагчдыг зэрэгцүүлж суулгахгүй. Танхим бүрт хяналтын багш байна.
- Бодолт эхлэх цагийг тэмдэглэж, сэдэв дээр заасан хугацаанд бодолт хийлгэнэ. Дуусах цагийг самбарт бичиж, сурагчдад харагдуулна.
- Бодолт эхлэхээс өмнө дүрмийг сурагчдад сануулж, хариултын хуудсанд ID, овог нэр, ангиллаа тод бичүүлнэ.
- Хугацаа дуусмагц хариултын хуудсыг нэг дор хураан авч, албан ёсны дүн гартал битүүмжилж хадгална.
- Сэдвийг сурагчдад зөвхөн бодолт дууссаны дараа өгч болно.
- Олимпиадын дүн гартал сэдвийг нийгмийн сүлжээ, чат групп, вэб хуудсанд байршуулахгүй, бодлогын зөв хариу, бодолтын талаар сошиал хуудсуудад ярилцахгүй, нийтлэхгүй байхыг багш нар, сурагчдад сануулна. Нэг сургууль бодолтоо дуусгасан ч бусад сургуульд бодолт үргэлжилж байж болохыг анхаарна уу.
Сурагчдад:
- Харандаа, бал, баллуур, шугам, гортиг, ноорог цаас авч ирнэ.
- Гар утас, тооны машин, ухаалаг цаг, таблет, ном, дэвтэр хэрэглэхгүй. Бусадтай ярилцах, хамтарч бодохыг хориглоно.
- Бодлого бүрийн хариу натурал тоо. Хариултын хуудсанд зөвхөн тоон хариугаа бичнэ.
- Олимпиадын дүн гартал сэдвийг сошиал хуудсанд байршуулахгүй, бодлогын хариу, бодолтын талаар нийтлэхгүй.
- ID-гаа зөв бичнэ. ID буруу бол дүн системд орохгүй байх эрсдэлтэй.
Олимпиад итгэлцэл дээр суурилдаг. Дэг журам зөрчигдсөн нь тогтоогдвол тухайн сурагч, сургуулийн дүнг хүчингүй болгож болно.
5. Олимпиадын дараа
- Сурагчдын хариултыг Excel загварт шивж, сургуулийн хуудасны «Системд хуулах» товчоор оруулна. Хугацаа: 10-р сарын 29-ний 17:30. Хоцорсон хариултыг хүлээн авахгүй.
- Оруулсны дараа «Хариулт харах» хэсгээс ID болон хариултыг хариултын хуудастай тулгаж шалгана.
- Урьдчилсан дүнг 10-р сарын 30-нд зарлана. Дэлгэрэнгүйг I давааны оролцох заавраас үзнэ үү.
Холбоо барих
Асуулт байвал registration@mmo.mn хаягаар сургуулийн нэр, аймаг/дүүрэг, ангиллаа бичиж ирүүлнэ үү. Сэдэв хүлээн авахтай холбоотой яаралтай асуудлаар аймаг, дүүргийнхээ мэргэжилтэнд хандана уу.
Сүүлийн засвар: 2026-10-29, Нийтэлсэн: 2026-10-28